എന്റെ സ്വകാര്യ ഇടങ്ങൾ ...!!!
.
എന്റെ മുറി , എന്റെ ഇടമാണ് ,
നാലുചുവരുകൾക്കുള്ളിൽ
അടച്ചിട്ട് , വാതിലും പൂട്ടി
എന്റെ ഗന്ധം പോലും
പുറത്തേക്കൊഴുകാത്ത
എന്റെ മാത്രം ഇടം ...!
.
ഇവിടെ ഞാൻ
പാട്ടുപാടും , നൃത്തം ചെയ്യും
ഓടിക്കളിക്കും , നഗ്നനായി നടക്കും
ഭക്ഷണം കഴിക്കും , കിടന്നുറങ്ങും
സംഭോഗം ചെയ്യും , സ്വയഭോഗവും ....!
.
ഇവിടെ ഞാനെന്റെ മനസ്സു തുറക്കും
സ്വപ്നം കാണും , സ്വപ്നത്തിൽ കാണും ,
എന്നെയറിഞ്ഞുകൊണ്ട്
ഇവിടേയ്ക്ക് സ്വമനസ്സാലെ
വരാനിഷ്ടപ്പെടുന്നവരെ
ഞാൻ ആനയിച്ചു സ്വീകരിക്കും....!
.
ആരെയും ശല്യപ്പെടുത്താതെ
ആർക്കും ഉപദ്രവമാകാതെ
ഞാൻ സ്വച്ഛന്ദം വിരാജിക്കുന്ന
എന്റെ മാത്രം ലോകം ...!
.
എന്റെയീ സ്വകാര്യതയിലേക്ക്
നിങ്ങളെന്തിന് അനാവശ്യമായി
ഒളിഞ്ഞു നോക്കുന്നു ...???
.
സുരേഷ്‌കുമാർ പുഞ്ചയിൽ
